1 Samuel 26

1जीफी लोक शौलाकडे गिबा येथे येऊन म्हणाले, यशीमोनासमोर हकीला डोंगरात दावीद लपला आहे की नाही? 2तेव्हा शौल उठला व आपल्याबरोबर इस्राएलाच्या तीन हजार निवडक माणसांना घेऊन दावीदाचा शोध करायला जीफ रानात गेला.

3शौलाने यशीमोनासमोरील मार्गाजवळ हकीला डोंगरावर तळ दिला; तेव्हा दावीद रानात राहत होता आणि त्याने पाहिले की आपला पाठलाग करायला शौल रानात आला आहे. 4म्हणून दावीदाने हेर पाठवले आणि शौल खचित आला आहे असे त्याला समजले.

5मग दावीद उठून शौलाने तळ दिला होता त्या ठिकाणावर आला आणि जेथे शौल व त्याचा सेनापती नेराचा मुलगा अबनेर हे निजले होते ते ठिकाण दावीदाने पाहिले; शौल तर छावणीत निजला होता व त्याच्यासभोवती लोकांनी तळ दिला होता.

6तेव्हा अहीमलेख हित्ती व सरूवेचा मुलगा अबीशय यवाबाचा भाऊ यांना दावीदाने उत्तर देऊन म्हटले छावणीत शौलाकडे खाली माझ्याबरोबर कोण येईल? तेव्हा अबीशय म्हणाला मी तुझ्याबरोबर खाली येईन. 7मग दावीद व अबीशय रात्री लोकांजवळ गेले आणि पाहा शौल छावणीत निजला आहे व त्याचा भाला त्याच्या उशाजवळ भूमीत रोवलेला व त्याच्यासभोवती अबनेर व लोक निजलेले आहेत. 8तेव्हा अबीशय दावीदाला म्हणाला आज परमेश्वराने तुझा शत्रू तुझ्या हाती दिला आहे; तर आता मी तुला विनंती करतो मला भाल्याने एकदाच घाव मारून त्याला भूमीवर ठार करून दे, मी त्याला दुसरा घाव मारणार नाही.

9पण दावीद अबीशयाला म्हणाला त्यांचा वध करू नकोस कारण यहोवाच्या अभिषिक्तावर आपला हात टाकून कोण निर्दोष राहील? 10दावीद म्हणाला, परमेश्वर जिवंत आहे; परमेश्वर त्याला मारील किंवा त्याचा मरण्याचा दिवस येईल किंवा तो खाली लढाईत जाऊन नष्ट होईल.

11मी आपला हात यहोवाच्या अभिषिक्तावर टाकावा असे परमेश्वराने माझ्याकडून घडू देऊ नये; परंतु आता मी तुला विनंती करतो की, तू त्याच्या उशाजवळचा भाला व पाण्याचा लोटा घे; मग आपण जाऊ. 12तेव्हा शौलाच्या उशाजवळून भाला व पाण्याचा लोटा हे दावीदाने घेतले मग कोणाला न दिसता व कोणाला न कळता व कोणी जागा न होता ते निघून गेले कारण ते सर्व झोपेत होते. देवाकडून त्याच्यांवर गाढ झोप आली होती.

13नंतर दावीद पलीकडे डोंगराच्या शिखरावर जाऊन दूर उभा राहिला आणि त्याच्यामध्ये मोठे अंतर होते; 14तेव्हा दावीदाने लोकांना व नेराचा मुलगा अबनेर याला हाक मारली. तो म्हणाला, अबनेरा तू उत्तर करीत नाहीस काय? तेव्हा अबनेराने उत्तर देऊन म्हटले राजाला हाक मारणारा असा तू कोण आहेस?

15मग दावीद अबनेराला म्हणाला, तू वीर पुरुष नाहीस काय आणि इस्राएलात तुझ्यासारखा कोण आहे? तर तू आपला प्रभू राजा याच्यावर पहारा का केला नाही? कारण लोकातला कोणीएक तुझा प्रभू राजा याचा घात करायला आला होता. 16ही जी गोष्ट तू केली ती बरी नाही; यहोवा परमेश्वर जिवंत आहे. तुम्ही आपला प्रभू यहोवाचा अभिषिक्त याला राखले नाही, म्हणून तुम्ही मरायला योग्य आहा. तर आता पाहा राजाचा भाला व पाण्याचा लोटा त्याच्या उशापाशी होता तो कोठे आहे?

17तेव्हा शौल दावीदाची वाणी ओळखून म्हणाला, माझ्या मुला दावीदा ही तुझी वाणी आहे काय? दावीद म्हणाला माझ्या प्रभू राजा, ही माझी वाणी आहे. 18तो म्हणाला, माझा प्रभू आपल्या दासाच्या पाठीस का लागला आहे? मी तर काय केले आहे? माझ्या हाती काय वाईट आहे?

19तर आता मी तुम्हाला विनंती करतो माझ्या प्रभू राजाने आपल्या दासाचे बोलणे ऐकावे: परमेश्वराने तुम्हाला माझ्यावर चेतवले असले तर त्याने अर्पण मान्य करावे. परंतु मनुष्याच्या संतानांनी चेतवले असले, तर ती देवाच्यासमोर शापित होवोत. कारण आज मला देवाच्या वतनात वाटा मिळू नये म्हणून त्यांनी मला बाहेर लावून म्हटले की, जा अन्य देवांची सेवा कर. 20तर आता माझे रक्त देवाच्या समक्षतेपासून दूर भूमीवर पडू नये; कारण जसा कोणी डोंगरावर तितराची शिकार करतो तसा, एका पिसवेचा शोध करण्यास इस्राएलाचा राजा निघून आला आहे.

21तेव्हा शौल म्हणाला, मी पाप केले आहे; माझ्या मुला दावीदा माघारा ये; माझा जीव आज तुझ्या दृष्टीने मोलवान होता, म्हणून मी यापुढे तुझे वाईट करणार नाही; पाहा मी मूर्खपणाने वागून फार अपराध केला आहे.

22मग दावीदाने असे उत्तर केले की, हे राजा पाहा हा भाला, तरुणातील एकाने इकडे येऊन तो घ्यावा. 23परमेश्वर प्रत्येक माणसाला त्याचा न्याय व त्याचे विश्वासूपण याप्रमाणे परत करो. कारण आज परमेश्वराने तुम्हाला माझ्या हाती दिले असता मी आपला हात देवाच्या अभिषिक्तावर टाकला नाही.

24पाहा जसा तुमचा जीव माझ्या दृष्टीने मोलवान होता, तसा माझा जीव यहोवाच्या दृष्टीने मोलवान होवो; आणि तो सर्व संकटातून सोडवो. तेव्हा शौल दावीदाला म्हणाला, माझ्या मुला दावीदा तू आशीर्वादित हो; तू मोठी कार्ये करशील व प्रबल होशील. मग दावीद आपल्या वाटेने गेला आणि शौलही आपल्या ठिकाणी परत गेला.

25